Շաբաթ 4 յունիս 2011-ի առաւօտեան, սկիզբ առաւ Պենետիկտոս ԺԶ Սրբազան Քահանայապետին 2011
տարուայ Միջազգային առաջին առաքելական ճամբորդութիւնը Խրուաթեա։ Պենետիկտոս ԺԶ.ի
այս միջազգային 19-րդ ճամբորդութիւնը, նաեւ կը հանդիսանայ 13րդ ճամբորդութիւնը Եւրոպա,
եւ երրորդը՝ երբեմնի Համայնավար երկիր։ Երջանկայիշատակ Յովհաննէս Պօղոս Բ. Խրուաթիան
այցելած էր 1994 ի սեպտեմբերին, ապա 1998-ի հոկտեմբերին՝ երբ երանելի հռչակեց Կարտինալ
Ստեփինաչը, հուսկ՝ 2003ի Յունիսին։ Նշենք թէ Խրուաթիան իր անկախութիւնը յայտարարած է
Սովետական Միութեան փլուզումէն ետք հոկտեմբեր 1991 -ին եւ այս տարի կը տօնախմբէ, ինչպէս
Հայաստանը` իր անկախութեան 20-ամեակը։ Յատկանշականը այն է որ՝ 1991-ին, Վատիկանը եղած
էր առաջին պետութիւնը որ ընդունած էր անկախութեան հռչակումը ։Առ այդ Սրբազան Քահանայապետի
այս ճամբորդութիւնը կը ստանայ թէ հովուական եւ թէ քաղաքական բնոյթ։ Խրուաթիոյ
Նախագահն է Իվօ Եոզիբովիչ, ընտրուած՝ 2010ին։ 2003ին Խրուաթիան Եւրոմիութեան անդամակցութեան
խնդրագիր ներկայացուցած էր եւ այս ուղղութեամբ բանակցութիւնները սկիզբ առած էին 2005-ին,
ու վերջ պիտի գտնեն այս տարի եւ յառաջիկայ 2012 - 2013 տարեշրջանին նախատեսուած է Խրուաթիոյ
եւրոմիութեան անդամակցութեան գրանցումը։ Սլովէնիայէն ետք` երբեմնի Եուկոսլավիոյ վեց հանրապետութիւններէն`
Խրուաթիան երկրորդ հանրապետութիւնն է որ մաս պիտի կազմէ եւրոպական ընտանիքին։ Խրուաթիոյ
մայրաքաղաքը Զաղրէպ ունի մէկ միլիոն 250 հազար բնակչութիւն, իսկ խրուաթիոյ ընդհանուր
բնակչութեան թիւն է 4,5 միլիոն որոնց 87,8% կաթողիկէ են 4,4% Ուղղափառ իսկ 1,3% մահմետական։ Խրուաթիոյ
կաթողիկէ եկեղեցւոյ վիճակագրութեան կեդրոնական գրասենեակի տուեալներուն համաձայն, Խրուաթիոյ
կաթողիկէ եկեղեցին կը հաշուէ 4 միլիոն հաւատացեալ։Խրուաթիոյ մէջ կը գործեն 17 եկեղեցական
գաւառներ, 1598 ժողովրդապետութիւններ։ Եպիսկոպոսներու թիւը կը հասնի 25-ի, հաւատացեալներու
հոգ հոգւոցով կը զբաղին 1540 թեմական կուսակրօն քահանաներ, 803 կրօնաւորներ եւ 3536
կրօնաւորուհիներ։ Կրթական մարզին մէջ, եկեղեցին ունի 22 նախակրթարաններ, ուր կը յաճախեն
1.135 դպրոցականներ, կան 12 ճեմարաններ` շուրջ 2.721 աշակերտներով եւ 7 համալսարաններ`
9.500 ուսանողներով։ Եկեղեցին ունի նաեւ 30 ծերանոցներ, 53 որբանոցներ, 14 ընտանեկան
կեդրոններ` կեանքի պաշտպանութեան համար։